Një nga frazat më irrituese që mund të dëgjoni kur jeni të mërzitur, të zemëruar apo të stresuar është: “Qetësohu.” Në teori tingëllon si një këshillë e mirë, por në praktikë shpesh ka efektin e kundërt. E njëjta gjë vlen edhe për “mos u shqetëso” ose “mos u streso”, të cilat mund t’ju bëjnë të ndiheni sikur emocionet tuaja po minimizohen.
Avokati amerikan Jefferson Fisher ka folur pikërisht për këtë situatë në një video në TikTok, ku sugjeron dy mënyra të thjeshta për t’iu përgjigjur dikujt që ju thotë të qetësoheni. Sipas tij, qëllimi nuk është të nisni një debat të ri, por të kuptoni se çfarë po kërkon realisht personi tjetër.
“Do të thuash të qetësohem apo të hesht?”Kjo është pyetja e parë që Fisher sugjeron të bëni.
Në vend që të reagoni menjëherë me nervozizëm, mund t’i kërkoni personit tjetër të sqarojë çfarë nënkupton me “qetësohu”. A dëshiron vërtet t’ju ndihmojë të menaxhoni emocionet, apo thjesht nuk dëshiron të dëgjojë atë që po thoni?
Pyetja e vendos bisedën në një tjetër nivel, sepse e detyron bashkëbiseduesin të shpjegojë qëllimin e tij. Ndonjëherë, “qetësohu” nuk është një përpjekje për t’ju ndihmuar, por një mënyrë për t’i dhënë fund një bisede që po bëhet e pakëndshme.
Në këtë rast, sqarimi mund të jetë më i dobishëm sesa një kundërpërgjigje e menjëhershme.
Ose thjesht: “Jo.”
Mënyra e dytë është shumë më e drejtpërdrejtë: “Jo.”
Kjo përgjigje mund të pasohet nga një shpjegim i thjeshtë, si: “Do të vendos vetë kur dua të qetësohem” ose “Nuk mund t’i përshtas emocionet e mia vetëm që ti të ndihesh më rehat”.
Ideja nuk është të refuzoni çdo përpjekje për t’ju ndihmuar të qetësoheni. Përkundrazi, bëhet fjalë për të mos lejuar që dikush tjetër t’ju diktojë se si duhet të ndiheni në një moment të caktuar.
Në fund të fundit, të qetësohesh është diçka që secili duhet ta bëjë në mënyrën dhe kohën e vet. Nëse një situatë ju ka mërzitur, mund të jetë më e dobishme të kuptoni fillimisht se çfarë po ndjeni dhe pse, në vend që thjesht ta shtypni emocionin sepse dikush tjetër ju tha “qetësohu”.
Ndonjëherë, mënyra më e mirë për të ruajtur kontrollin e një bisede nuk është të ngrini zërin, por të vendosni kufirin qartë dhe pa e përshkallëzuar situatën./Anabel
